ربنا يبعد عنك افلام أمينة رزق وقراءة الجرائد وبرامج التوك شو .. قول أمين!

أنا من الناس اللى مش بحب الحزن ولا الاكتئاب ولا النكد .. ودائما ارفع شعار حناخد إيه من النكد والهم غير حرقة الدم فباديها طناش .. وكنت دائما احاول لما أشوف حد مكتئب إنى اخَرّجه من الحالة دي .. وده مش علشانه بس ، ده كمان علشان ماخدش أنا كمان عدوى الإكتئاب وأقع فريسة لفيرس التشائم والنظرات السوداوية للحياة .

وكانت جهودي فى إخراج الناس اللى يهمنى أمرهم من الحالة دي تذهب أدراج الرياح ..وكنت من شدة غيظى من فشل بعض محاولاتي معهم أقول فى نفسي (( خلاص بأه هما أحرار واللى بشيل قربة نكد بتخر على دماغه )) .. وأتذكر حوار كان بينى وبين سيدة كبيرة فى السن وكانت لسه راجعة من العمرة فى الأراضي المقدسة ، وكلمتها فى التليفون علشان ابارك لها ,اقول لها ( الحمد الله على السلامه) .. فلك أن تتخيل جرعة الإكتئاب والتشائم اللى اخدتهم منها مرة واحدة والشكوى من الأمراض وإنها خلاص مش حتعرف تعمل عمره تاني وان نفسها ترجع تاني لكن الصحة خلاص .. وكنت لما احاول إنى أرفع من روحها المعنوية اللى ضاربها السلك لا أجد منها إلا مزيدا من كلمات الاحباط المتمثلة فى ( صعب ) و ( مش ممكن) وغيرها من الكلمات الدايرة فى قاموس التشائم واللى بتوقف المراكب السايرة .. دى حتى لم تجامل كلماتي التفائلية وتوهمنى بشىء من الامل داخلها لكن هى أعطتنى سيل من كلمات التشائم حتى لا أتجرأ وأكون متفائلا بعد كده .

فهل من حق المكتئب إنه يخلى الناس اللى حواليه مكتئبة ويدفعهم دفعا هم كمان ليعيشوا سيمفونية نكدية من بتوع ( أمينة رزق) الله يرحمها .. ولإن الاكتئاب حرية شخصية زيه زى حرية التعبير تمام فبرده التفائل حرية شخصية .. ومش من حق أى مكتئب إنه يحقد على المتفائلين ويسعى بكل ما أوتي من قوة للتبشير بفوائد الاكتئاب والتشائم .. مش كده وبس ده فضلا كمان عن دعوته المتفائلين ليضربوها إكتئاب ومناحة ويبأه الكل فى الهوا سوا ومحدش أحسن من حد ويبأه لا تعايرني ولا اعايرك ده الإكتئاب طايلني وطايلك .

وحصل إنى قابلت مرة أحد الداعين إلى التشائم اللى مش بيطيق يشوف حد مبسوط إلا ولازم يرش جرعة التشائم التمام .. فكنت جالس على القهوة مع مجموعة من الاصدقاء وكنا بنتكلم عن المستقبل والأحلام وهكذا .. وكان فيه راجل على الطرابيزة اللى جمبنا وكان بيشد فى شيشة بعدين يطرد الدخان فى الهواء من مناخيره وفمه بحرقة شديدة .. ولو كان طايل يطلعه من ودانه كمان لفعل ..ويظهر أن صوتنا كان وصله .. فسمع الكلمتين بتوعنا عن المستقبل وعن الأمل وعن الحياة كإنه إتكهرب وبصلنا كده نظرة كلها حقد على هؤلاء الشباب الطايش اللى عندهم داء التفائل .. وقال لنا لا مؤاخذه يا شباب ممكن اشارك فى الحوار .. قلنا له مؤاخذتك معاك وماله يا عم شارك .

وانطلق الرجل كالمدفع الرشاش بسيل من الكلمات التشائمية فى كل النواحي من أول رغيف العيش والمواصلات والاعلام والفن والزواج ..وفى الاخر سالنا إنتوا بـأه متفائلين ليه !! .. وبتفكروا فى بكره ليه !! ثم ختم كلامه بــ ( كله محصل بعضه) ثم رجع يشد فى الشيشة أنفاس تعقبها أنفاس ويخرج الدخان اللى حامل كل هموم الدنيا وقرفها من خياشيمه .. فده واحد من دعاة التشائم دخل فى الحوار التفائلي ليبث فى المكان جرعة تشائمية ويعكر صفو القعدة الحلوة .. وإذا كان هو مكتئب فما الداعي إنه ينشر إكتئابه ويقل مزاج الناس .. ومع إن كلام الرجل كان به كثيرا من المنطق والواقعية فإحنا مش بنخالفه فى اللى بيقوله ولكن بنخالفه فى كيفية التعامل مع هذه الامور .. أصل الإستسلام للإكتئاب حيعمل إيه ! يعنى مثلا لو الطالب إستسلم لفكرة البطالة مش حيذاكر ! ولو الراجل إستسلم لفكرة إن الجواز هم ونكد وغم محدش حيتجوز ! .. فالإكتئاب مش حيعمل حاجه ومش حناخد منه غير الهم .. فالتفائل هو اخر خيط ممكن يخيلنا نبص لبكرة إنه ممكن يكون أحسن .. علشان الحياة تستمر .. يا أخي إبتسم ..ولو معرفتش حااااااااول ..إبتسم من فضلك قبل ما يكون الإبتسام بفلوس .. ربنا يبعد عنك افلام أمينة رزق وقراءة الجرائد وبرامج التوك شو .. قول أمين!

بقلمي

ميـــــــــدو

زائر

بارك الله فيك والى الامام

مشكور يا سمسم على إهتمامك بالموضوع وردك عليه بس أنا نفسى الناس إللى تتدخل وترد على الموضوع تشارك برأيها برضه فى الموضوع